PSG ilitoa Ofa ya €250 milioni kwa Lamine Yamal, Barcelona wakataa - Laporta afunguka. Rais wa klabu ya FC Barcelona, Joan Laporta, ameweka wazi kuwa klabu ya Paris Saint-Germain (PSG) iliwahi kuwasilisha ofa nono ya euro milioni 250 kwa ajili ya kinda nyota Lamine Yamal lakini Barca waliikataa bila kusita. Akizungumza kuhusu tukio hilo, Laporta amesema ofa hiyo iliwasilishwa takribani miaka miwili iliyopita wakati Yamal akiwa na umri wa miaka 17 pekee. “Lamine alikuwa na miaka 17, miaka miwili iliyopita… PSG walituma pendekezo la euro milioni 250 na tulisema hapana. Nakumbuka baadhi ya watu walifikiri tulikuwa tumepoteza akili,” ameeleza Laporta. Kwa mujibu wa Kiongozi huyo wa Barcelona, uamuzi wa kuikataa ofa hiyo haukuwa wa kifedha bali wa kimkakati na kihistoria. Klabu hiyo inaamini Yamal ni sehemu ya mradi wa muda mrefu wa kurejesha enzi za mafanikio Camp Nou. “Kwa sisi, amekuwa asiyeuzwa. Hagusiki,” alisisitiza Laporta. Kwa kuzingatia ukubwa wa ofa hiyo, wengi walihoji kama Barcelona walipaswa kukubali kiasi hicho kikubwa cha fedha, hasa katika kipindi ambacho klabu hiyo ilikuwa inapitia changamoto za kifedha. Hata hivyo, maendeleo ya haraka ya Yamal ndani ya kikosi cha kwanza na mchango wake katika mafanikio ya timu yameanza kuhalalisha msimamo wa uongozi. Yamal ameonekana kuwa moja ya vipaji adimu vilivyotoka "Akademi" ya La Masia, akionesha utulivu, ubunifu na ujasiri mkubwa licha ya umri wake mdogo. Kauli ya Laporta inaashiria wazi kwamba Barcelona haioni thamani ya Yamal kwa mizani ya fedha pekee. Kwao, ni Mrithi wa kizazi kipya cha Nyota wa klabu hiyo, Mchezaji wa kujengwa kuzunguka mradi wa baadaye. Katika soko la sasa la uhamisho, euro milioni 250 ni kiwango kinachoweza kubadilisha historia ya klabu yoyote. Lakini kwa Barcelona, Lamine Yamal si bidhaa ya kuuzwa ni alama ya mustakabali wao. Toa maoni yako #Sports

Washauri wamzuia Trump kushambulia Iran, lakini Lindsey Graham amsukuma aanzishe mashambulizi. Mvutano wa kisiasa umeibuka ndani ya kambi ya Rais wa Marekani, kufuatia taarifa kwamba baadhi ya Washauri wake wa karibu wamemtaka asichukue hatua ya kijeshi dhidi ya Iran. Hata hivyo, sauti kinzani imejitokeza kutoka kwa Seneta wa chama cha Republican, Lindsey Graham, ambaye amemtaka Rais huyo kupuuza ushauri huo na kuidhinisha mashambulizi. Kwa mujibu wa ripoti ya Axios, mjadala mkali umeendelea ndani ya duru za Ikulu ya White House kuhusu hatma ya sera ya Marekani dhidi ya Iran, wakati hali ya usalama Mashariki ya Kati ikiendelea kuwa tete. Taarifa zinaeleza kuwa baadhi ya Washauri wa karibu wa Rais Donald Trump wana hofu kuwa shambulio lolote la kijeshi dhidi ya Iran linaweza kusababisha mzozo mpana wa kikanda, na hata kuvuta mataifa mengine kuingia vitani. Wanaonya kuwa hatua hiyo inaweza kuathiri maslahi ya Marekani kimataifa, pamoja na uchumi wa dunia. Kwa mtazamo wao, njia ya diplomasia na vikwazo vya kiuchumi bado zinaweza kuwa mbinu mbadala ya kushinikiza Tehran bila kuingia kwenye mapambano ya wazi ya kijeshi. Kinyume chake, Seneta Lindsey Graham amesisitiza kuwa Marekani inapaswa kuonyesha nguvu na uthabiti dhidi ya Iran. Amedai kuwa kusita kuchukua hatua kunaweza kutafsiriwa kama udhaifu, na kuipa Iran nafasi ya kuendelea na kile anachokiona kama vitendo vya uchokozi katika ukanda huo. Kauli yake inaongeza presha ya kisiasa kwa Rais Trump, hasa kutoka kwa makundi ya wahafidhina wanaotaka msimamo mkali dhidi ya Tehran. Huku mjadala huo ukiendelea, macho ya jumuiya ya kimataifa yameelekezwa Washington. Uamuzi wowote wa Marekani unaweza kubadilisha mwelekeo wa siasa za Mashariki ya Kati na kuathiri usalama wa kimataifa. Kwa sasa, haijafahamika ni msimamo gani utachukuliwa rasmi na Ikulu, lakini kinachoonekana wazi ni kwamba mgawanyiko wa kimtazamo ndani ya uongozi wa Marekani umeibuka wazi katika suala la Iran. Toa maoni yako #Habari

Uingereza yakataa ombi la Trump kutumia kambi zake za kijeshi kushambulia Iran. Serikali ya Uingereza imekataa rasmi ombi la Rais wa Marekani, Donald Trump, la kutaka kutumia kambi za kijeshi za Uingereza kama vituo vya kuanzishia mashambulizi yanayoweza kulenga Iran. Kwa mujibu wa taarifa za kidiplomasia, ombi hilo lilihusisha matumizi ya kambi muhimu zikiwemo Diego Garcia katika Bahari ya Hindi pamoja na RAF Fairford iliyoko Gloucestershire. Vyanzo vya serikali Mjini London vinaeleza kuwa uamuzi huo umechukuliwa kwa kuzingatia maslahi ya kitaifa na tahadhari dhidi ya kuongezeka kwa mvutano wa kijeshi Mashariki ya Kati. Msimamo huo unaonyesha kuwa Uingereza haitaki kuhusishwa moja kwa moja na operesheni yoyote ya kijeshi dhidi ya Iran bila mchakato mpana wa kidiplomasia na kibali cha kimataifa. Ingawa Marekani na Uingereza ni washirika wakubwa wa kijeshi kupitia Muungano wa NATO, London imeonekana kuchukua tahadhari kubwa katika suala linaloweza kusababisha vita pana katika eneo la Ghuba. Kisiwa cha Diego Garcia ni kituo cha kimkakati kinachotumiwa kwa ushirikiano wa kijeshi kati ya Marekani na Uingereza. Kimewahi kutumika kama kitovu cha operesheni za kijeshi katika Mashariki ya Kati, hasa wakati wa vita vya Iraq na Afghanistan. Kwa upande mwingine, RAF Fairford imekuwa ikitumika mara kadhaa kupokea ndege za kivita za Marekani, zikiwemo mabomu mazito ya masafa marefu kama B-52. Hatua ya Uingereza inaweza kuathiri kwa kiwango fulani uratibu wa kijeshi kati ya Washington na London, hasa wakati ambapo mvutano kati ya Marekani na Iran unaongezeka. Hadi sasa, Ikulu ya White House haijatoa tamko rasmi kuhusu msimamo wa Uingereza, huku Wachambuzi wa siasa za kimataifa wakitathmini iwapo uamuzi huo utaashiria tofauti ya kimkakati kati ya washirika hao wawili wa muda mrefu. Mvutano kati ya Marekani na Iran umeendelea kuwa tete, hasa katika masuala yanayohusu nyuklia na ushawishi wa kikanda. Je, uamuzi wa London utatuliza hali au utaongeza presha za kidiplomasia? Dunia inaendelea kufuatilia kwa karibu. Toa maoni yako #Habari

Vatican yakataa mwaliko wa Trump kujiunga na “Bodi ya Amani”. Mvutano mpya wa kidiplomasia umeibuka baada ya Vatican kukataa rasmi mwaliko wa Rais wa Marekani kujiunga na kile kilichoelezwa kama “Bodi ya Amani”, mpango ambao umekuwa ukizua mjadala mkali katika duru za kimataifa. Kwa mujibu wa taarifa rasmi iliyotolewa na Katibu wa Jimbo la Vatican, Cardinal Pietro Parolin, Taasisi ya Kiti Kitakatifu haitashiriki katika mpango huo, ikitaja sababu za kimsingi zinazohusiana na mwelekeo na uhalali wa jukwaa hilo. Katika kauli yake, Kardinali Parolin alisema: “Kuna masuala nyeti na hoja ambazo zinatuacha katika mshangao mkubwa.” Alisisitiza kuwa masuala ya migogoro ya kimataifa, ikiwemo hali ya Gaza, yanapaswa kushughulikiwa ndani ya mfumo wa kimataifa uliopo badala ya kuanzishwa kwa chombo mbadala kinachoongozwa na taifa moja. Kwa mujibu wa Vatican, “Migogoro ya kimataifa kama wa Gaza inapaswa kushughulikiwa chini ya mwavuli wa Umoja wa Mataifa, si kupitia jukwaa mbadala linaloongozwa na Marekani.” Hatua hiyo inatajwa kama pigo la kidiplomasia kwa Ikulu ya White House, hasa ikizingatiwa kuwa baadhi ya washirika wa Magharibi tayari wameonesha kusita au kujiondoa katika mpango huo kabla hata ya mkutano wake wa kwanza mkubwa. Uamuzi huo kutoka Vatican ya Pope Leo XIV unaongeza shinikizo kwa mpango wa Rais huyo wa Marekani, ambao ulikusudiwa kuonesha dira mpya ya uongozi wa kimataifa katika kutafuta amani. Kwa sasa, jicho la dunia linaelekezwa kuona hatua inayofuata ya Washington, huku Vatican ikiweka msimamo wazi: haitashiriki katika bodi hiyo mpya. Toa maoni yako #Habari

Marekani yakaribia vita kubwa na Iran - Ripoti ya Axios. Axios imeripoti kuwa mvutano kati ya Marekani na Iran unaongezeka kwa kasi, hali inayoweza kuisukuma dunia kushuhudia vita kubwa kati ya mataifa hayo mawili yenye ushawishi mkubwa kisiasa na kijeshi. Kwa mujibu wa ripoti hiyo, hatua za kidiplomasia zimeanza kupungua huku msimamo wa pande zote ukiwa mkali zaidi, hasa kuhusu masuala ya nyuklia na usalama wa eneo la Mashariki ya Kati. Chanzo hicho kimeeleza kuwa hofu kubwa inahusiana na mpango wa nyuklia wa Iran, ambao kwa muda mrefu umekuwa ukipingwa vikali na Marekani pamoja na washirika wake. Marekani imekuwa ikiishutumu Iran kwa kuendeleza teknolojia inayoweza kutumika kutengeneza silaha za nyuklia, jambo ambalo Tehran imekuwa ikilikanusha mara kwa mara. Mchambuzi mmoja wa masuala ya kimataifa alinukuliwa akisema, "Ikiwa hakutakuwa na suluhu ya haraka ya kidiplomasia, uwezekano wa mapambano ya moja kwa moja unaongezeka kila siku." Ripoti hiyo pia inaeleza kuwa Marekani imeongeza uwepo wake wa kijeshi katika maeneo muhimu ya kimkakati, huku Iran nayo ikitoa onyo kali dhidi ya kile ilichokiita vitisho vya wazi. Afisa mmoja wa ngazi ya juu alinukuliwa akisema, "Tuko tayari kulinda maslahi yetu na washirika wetu kwa gharama yoyote." Kwa upande wake, Iran imeonya kuwa haitakubali kushinikizwa au kutishwa, ikisisitiza kuwa itajibu hatua yoyote ya kijeshi kwa nguvu inayostahili. Jamii ya kimataifa sasa inatazama kwa karibu hali hiyo, huku Wachambuzi wakionya kuwa mgogoro wa wazi kati ya Marekani na Iran unaweza kuathiri soko la mafuta, usalama wa kimataifa na uthabiti wa kisiasa katika eneo lote la Mashariki ya Kati. Hadi sasa, hakuna tamko rasmi la vita lililotolewa, lakini mwelekeo wa matukio unaonyesha kuwa mvutano huo unaweza kuingia katika hatua mpya yenye athari kubwa kwa dunia nzima. Toa maoni yako #Habari #Iran #America #Vita #Nyuklia #SiasaZaKimataifa

Kylian Mbappé amshambulia Gianluca Prestianni kabla ya mechi marudiano huko Bernabéu. Mvutano umeibuka kabla ya pambano kubwa linalotarajiwa kupigwa katika dimba la Santiago Bernabéu Stadium, baada ya mshambuliaji wa klabu ya Real Madrid, Kylian Mbappé kutoa kauli nzito dhidi ya kijana Gianluca Prestianni kisa sakata lake na Vini. Katika mahojiano aliyofanya na TNT Sports Brazil, Mbappé hakusita kueleza msimamo wake kuhusu uwezekano wa Prestianni kucheza katika mechi hiyo muhimu. “Natumaini sitamuona Prestianni katika Uwanja wa Bernabéu wiki ijayo… kwa hakika hapaswi kucheza katika Uwanja bora zaidi duniani, hastahili kuwa sehemu ya mchezo huo.” Kauli hiyo imezua mjadala mpana miongoni mwa mashabiki wa soka, hasa ikizingatiwa ukubwa wa mechi hiyo inayotarajiwa kuzikutanisha klabu mbili zenye historia kubwa barani Ulaya. Mbappé aliendelea kusisitiza kuwa, licha ya matarajio yake ya kushuhudia mechi bora, anaamini Prestianni hapaswi kupewa nafasi ya kushiriki. “Nina uhakika utakuwa mchezo wa kuvutia sana, klabu mbili za kihistoria zikiwa Uwanjani, lakini kwa mtazamo wangu Prestianni anapaswa kuwa nje.” Kauli yake ya mwisho ndiyo imeongeza moto zaidi katika sakata hilo, akitoa maoni yanayoashiria kuwa anatamani hatua kali zichukuliwe. “Haya ni maoni yangu, natumaini atafungiwa.” Hadi sasa hakuna tamko rasmi kutoka upande wa Prestianni au klabu yake kujibu kauli hizo. Hata hivyo, presha imeongezeka kuelekea mchezo huo, huku mashabiki wakisubiri kuona kama maneno hayo yatageuka kuwa chachu ya ushindani mkali zaidi Uwanjani. Toa maoni yako #Sports #Habari

Gianluca Prestianni ajibu baada ya kudaiwa kumtukana Vinicius Jr. Gianluca Prestianni ametoa taarifa rasmi baada ya kudaiwa kumkosea heshima Vinicius Jr. Prestianni ameeleza wazi: “Nataka kufafanua kwamba, sikuwahi kumtukana Mchezaji wa Real Madrid wowote ule, Vinicius Jr, kwa bahati mbaya alikosea kuelewa yale aliyoamini akinisikia nikisema.” Aidha, Mchezaji huyo wa Argentina ameongeza: “Sijawahi kumchukia Mtu kwa rangi na ninajuta kwa vitisho nilivyopokea kutoka kwa Wachezaji wa Real Madrid.” Taarifa hii inakuja baada ya kashfa ya madai ya ubaguzi wa rangi iliyosambaa kwenye mitandao ya kijamii, na Prestianni ameonekana kujaribu kuondoa kashfa hiyo kwa uwazi wake. Hii ni hatua muhimu kwa Mchezaji huyo ili kulinda heshima yake na kuweka wazi msimamo wake dhidi ya ubaguzi wa rangi. Toa maoni yako #Sports #Habari

Afghanistan yaipongeza Iran kwa “ushindi” wa vita vya siku 12. Msemaji wa serikali ya Afghanistan, Zabihullah Mujahid, amesema kuwa Iran iliibuka mshindi katika mapigano ya hivi karibuni yaliyodumu kwa siku 12, akieleza kuwa taifa hilo lina uwezo wa kujilinda dhidi ya tishio lolote la kijeshi. Akizungumza kuhusu mvutano huo, Mujahid alinukuliwa akisema kwamba, “Iran ilitoka kidedea katika vita vya hivi karibuni vilivyodumu kwa siku 12.” Alisisitiza zaidi uwezo wa kijeshi wa Tehran kwa kueleza kuwa, “Ina uwezo wa kushinda na kujilinda dhidi ya uvamizi wowote.” Kauli hiyo inaonekana kuashiria msimamo wa wazi wa Afghanistan kuhusu nafasi ya Iran katika mzozo huo, hasa katika kipindi ambacho hali ya usalama katika eneo la Mashariki ya Kati inaendelea kuwa tete. Katika hatua nyingine, Mujahid alieleza mshikamano wa watu wa Afghanistan iwapo Iran itakabiliwa na shambulio jingine. Alisema wazi kuwa, “Ikiwa Iran itashambuliwa, watu wa Afghanistan watasimama kwa umoja na kutoa msaada kamili kwa ndugu zao Wairani.” Tamko hilo linaashiria uhusiano wa karibu wa kisiasa na kidiplomasia kati ya Kabul na Tehran, huku likionyesha uwezekano wa ushirikiano wa karibu zaidi katika masuala ya usalama wa kikanda. Kauli ya Afghanistan inaweza kuongeza mjadala wa kimataifa kuhusu mizania ya nguvu katika eneo hilo, hasa ikizingatiwa mvutano unaoendelea kati ya Iran na mataifa yanayoihusisha na vitisho vya usalama. Wachambuzi wa siasa za kimataifa wanaona kuwa matamko ya aina hii yanaweza kuwa na athari kwa diplomasia ya kikanda, hasa katika kuunda miungano mipya au kuimarisha iliyopo. Kwa sasa, dunia inaendelea kufuatilia kwa karibu mwelekeo wa uhusiano kati ya Afghanistan na Iran, na jinsi yatakavyoathiri siasa za Mashariki ya Kati katika siku zijazo. Toa maoni yako #Habari

🇰🇵 Kim Jong Un azindua makaziapya Pyongyang kwa familia za Wanajeshi waliofariki dunia. Kiongozi wa Korea Kaskazini, Kim Jong Un, amefungua rasmi mradi mpya wa makazi katika Mji Mkuu wa Pyongyang, uliolengwa kuwahudumia familia za wanajeshi waliopoteza maisha wakilitumikia taifa hilo. Kwa mujibu wa vyombo vya habari vya taifa, makazi hayo yamejengwa kwa hadhi ya juu kama ishara ya kutambua mchango na kujitoa kwa wanajeshi waliofariki vitani au katika majukumu ya kijeshi. Akizungumza wakati wa hafla ya uzinduzi, Kim Jong Un alinukuliwa akisema: “Familia za mashujaa wetu waliolitoa uhai wao kwa ajili ya taifa hili zinastahili kuishi kwa heshima na utulivu.” Aliongeza kuwa: "Ni wajibu wa serikali kuhakikisha kuwa watoto na wake wa wanajeshi wetu wanaendelea kuishi maisha bora, wakiwa na makazi salama na ya kisasa.” Mradi huo ni sehemu ya mpango mpana wa maendeleo ya makazi unaoendelea nchini humo, hasa katika Mji wa Pyongyang, ambako serikali imekuwa ikiwekeza katika ujenzi wa majengo mapya ya kisasa kwa lengo la kuboresha ustawi wa raia wake. Wachambuzi wa masuala ya siasa za Korea Kaskazini wanasema hatua hiyo pia inalenga kuimarisha mshikamano wa kitaifa na kuonyesha umuhimu unaotolewa kwa Jeshi, ambalo lina nafasi kubwa katika mfumo wa uongozi wa nchi hiyo. Katika miaka ya karibuni, Pyongyang imekuwa ikishuhudia miradi kadhaa ya makazi ya ghorofa za kisasa, huku serikali ikisisitiza kuwa maendeleo ya Mji huo ni kielelezo cha mafanikio ya sera zake za kiuchumi na kijamii. Uzinduzi wa makazi haya mapya unatajwa kama ishara ya kutambua sadaka ya wanajeshi waliopoteza maisha, huku serikali ikiendelea kusisitiza msimamo wake wa kulinda na kuenzi waliolitumikia taifa kwa uaminifu. Toa maoni yako #Habari

Umoja wa Afrika wasisitiza “Hakuna kuvumilia kabisa” dhidi ya mapinduzi na mabadiliko yasiyo ya kikatiba. Umoja wa Afrika (AU) umetangaza msimamo mkali dhidi ya mabadiliko ya serikali yanayokiuka katiba katika nchi wanachama, ukisisitiza sera ya “Hakuna kuvumilia kabisa” kwa vitendo vinavyovuruga utawala wa kikatiba na utulivu wa bara la Afrika. Kauli hiyo imekuja wakati bara la Afrika likikabiliwa na changamoto za mapinduzi ya kijeshi, migogoro ya kisiasa na kuingiliwa kwa masuala ya ndani na nguvu za kigeni. Viongozi wa AU wamesema hatua madhubuti zinahitajika ili kuhakikisha silaha zinanyamaza na misingi ya demokrasia unalindwa. Akizungumza kwa niaba ya Umoja huo, Mwenyekiti wa sasa wa AU na Rais wa Burundi, Évariste Ndayishimiye, alisisitiza umuhimu wa kulinda mamlaka ya nchi za Afrika dhidi ya ushawishi wa nje. “Hakuna nchi ya Afrika inayopaswa kutawaliwa tena kikoloni, kuvamiwa au kulazimishwa kujisalimisha kwa mamlaka yoyote ya kigeni katika karne ya 21.” Kauli hiyo inaonesha msimamo wa wazi wa Umoja wa Afrika kupinga aina yoyote ya kuingiliwa kwa uhuru wa nchi wanachama, iwe kwa njia ya mapinduzi ya ndani au shinikizo la kimataifa. Kwa mujibu wa misingi ya AU, mabadiliko yoyote ya serikali yanapaswa kufuata katiba na taratibu za kisheria zilizowekwa. Umoja huo kwa muda mrefu umekuwa ukitoa adhabu kama kusimamisha uanachama kwa nchi zinazoshuhudia mapinduzi ya kijeshi au hatua nyingine zisizo za kikatiba. Tamko la “Zero Tolerance” linatafsiriwa kama onyo kwa vikundi vyote vinavyotaka kutumia nguvu kuchukua madaraka, pamoja na ujumbe kwa mataifa ya nje kuheshimu mamlaka ya bara la Afrika. Sera hiyo pia inaunganishwa na azma ya muda mrefu ya AU ya “Kuzinyamazisha silaha barani Afrika,” kampeni inayolenga kumaliza migogoro ya kivita na kuimarisha amani na usalama. Wachambuzi wa masuala ya siasa wanasema msimamo huo unaashiria jitihada za kuimarisha mshikamano wa bara na kulinda misingi ya uhuru, demokrasia na utawala wa sheria. Kwa ujumla, kauli ya Umoja wa Afrika inatoa ujumbe mzito: Bara haliko tayari kuvumilia mapinduzi, uvamizi au aina yoyote ya utawala wa kulazimishwa katika zama za sasa. Toa maoni yako #Habari

Ayatollah Khamenei amuonya Trump: “Tunasubiri watushambulie” Kiongozi Mkuu wa Iran, Ali Khamenei, ametoa onyo kali kwa Rais wa Marekani, Donald Trump, akisema kuwa shambulio lolote litakalofanywa na Marekani dhidi ya Iran litakuwa na madhara makubwa kwa Washington na washirika wake. Akizungumza katika hotuba yake ya hivi karibuni, Ayatollah Khamenei alisisitiza kuwa Iran iko tayari kujibu hatua yoyote ya kijeshi itakayochukuliwa dhidi yake. “Shambulio lolote la Marekani dhidi ya Iran litakuwa funzo kwa Marekani na washirika wake.” amesema Kiongozi huyo. Ayatollah Khamenei aliendelea kueleza kuwa taifa lake halitaogopa vitisho vya nje, bali litasimama imara kulinda mamlaka na heshima yake katika jukwaa la kimataifa. “Tunataka tutoe somo kwa ulimwengu. Tunasubiri watushambulie.” Kauli hiyo imeongeza joto katika mvutano wa muda mrefu kati ya Tehran na Washington, hasa katika kipindi ambacho kumekuwa na sintofahamu kuhusu masuala ya usalama wa eneo la Mashariki ya Kati, programu ya nyuklia ya Iran, pamoja na ushawishi wa kijeshi wa pande zote mbili katika kanda hiyo. Wachambuzi wa siasa za kimataifa wanaona kauli hii kama ujumbe wa wazi wa kuonyesha msimamo mkali wa Iran dhidi ya kile kinachoonekana kuwa shinikizo la Marekani. Hata hivyo, bado haijabainika iwapo matamshi haya yatafuatiwa na hatua za moja kwa moja za kijeshi au yatabaki katika kiwango cha tahadhari za kisiasa. Mvutano kati ya Marekani na Iran umekuwa ukipanda na kushuka kwa miaka kadhaa, huku kila upande ukitoa matamshi makali yanayoashiria uwezekano wa mzozo mkubwa zaidi endapo diplomasia haitapewa kipaumbele. Toa maoni yako #Habari

MONUSCO haiwezi kulazimisha amani - Antonio Guterres aeleza msimamo. MONUSCO imeendelea kuwa katikati ya juhudi za kimataifa za kurejesha utulivu mashariki mwa Jamhuri ya Kidemokrasia ya Congo, huku hali ya usalama ikiendelea kuwa tete. Katibu Mkuu wa Umoja wa Mataifa, Antonio Guterres, amekiri wazi kuwa ujumbe huo wa kulinda amani hauna uwezo wa kulazimisha amani kwa nguvu. Akizungumza katika mahojiano na RFI, Guterres alisema: "MONUSCO haina uwezo wa kulazimisha amani. Haina mamlaka wala uwezo wa kufanya hivyo. Lakini tunachofanya ni kushiriki kikamilifu katika mawasiliano kati ya pande zote mbili, na pia katika mawasiliano na wapatanishi wengine, ili kujaribu kwa hatua kurejesha imani ambayo imevunjika kabisa.” Kauli hiyo inakuja wakati kukiwa na mjadala mpana kuhusu nafasi na ufanisi wa MONUSCO katika kukabiliana na makundi yenye silaha mashariki mwa DRC. Wakosoaji wamekuwa wakihoji kwa nini ujumbe huo haujaweza kumaliza kabisa ghasia zinazoendelea kwa miaka mingi. Hata hivyo, kwa mujibu wa Guterres, jukumu la MONUSCO si kuanzisha vita dhidi ya pande zinazokinzana, bali ni kusaidia mazingira ya mazungumzo, kupunguza mvutano, na kujenga tena uaminifu kati ya wahusika wa mgogoro. Matamshi ya Katibu Mkuu yanaashiria mkakati wa kidiplomasia unaolenga suluhisho la kisiasa badala ya kijeshi. Kurejesha imani kati ya pande husika kunatajwa kuwa hatua ya kwanza muhimu kabla ya kufikia makubaliano ya kudumu ya amani. Kwa sasa, MONUSCO inaendelea na mawasiliano na wadau wa ndani na wa kimataifa, huku shinikizo likiongezeka kutoka kwa baadhi ya wananchi wa DRC wanaotaka ujumbe huo uondoke haraka. Kauli ya Guterres inaweka wazi mipaka ya uwezo wa operesheni za kulinda amani: zinaweza kusaidia, kushauri na kupatanisha lakini si kulazimisha amani kwa nguvu. Toa maoni yako #Habari

Trump aonyesha utayari wa kukutana na Kiongozi wa Mapinduzi ya Iran. Mvutano wa kidiplomasia kati ya Marekani na Iran unaendelea kuchukua sura mpya, huku Washington ikionesha ishara za kutaka kufungua ukurasa wa mazungumzo mapya na Tehran. Waziri wa Mambo ya Nje wa Marekani, Marco Rubio, amesema kuwa Rais wa Marekani, Donald Trump, yuko tayari kukutana na Kiongozi wa Mapinduzi ya Iran iwapo upande wa Iran utaonesha nia ya kufanya hivyo. Akizungumza kuhusu msimamo wa Marekani, Rubio alisema: “Trump ameonesha utayari wake kukutana na Kiongozi wa Mapinduzi ya Iran ikiwa atapenda kufanya hivyo.” Kauli hiyo inaonekana kufungua uwezekano wa mazungumzo ya moja kwa moja kati ya pande hizo mbili ambazo kwa muda mrefu zimekuwa katika mvutano wa kisiasa, kiusalama na kiuchumi. Kwa mujibu wa Rubio, Marekani inaendelea kufanya kazi kwa lengo la kufikia makubaliano mapya na Iran, hasa katika masuala yanayohusu usalama wa kikanda na mpango wa nyuklia wa Tehran. Rubio aliongeza kuwa: "Tunafanya kazi kufikia makubaliano na Iran, na mikutano ijayo itaonesha kama maendeleo yanaweza kupatikana.” Kauli hiyo inaashiria kuwa mazungumzo ya ngazi za juu yanatarajiwa kufanyika katika siku zijazo, huku macho ya jumuiya ya kimataifa yakielekezwa kwenye iwapo juhudi hizo zitazaa matunda au la. Uhusiano kati ya Washington na Tehran yamekuwa ya misukosuko kwa miaka kadhaa, hasa baada ya Marekani kujiondoa katika makubaliano ya nyuklia ya mwaka 2015 na kurejesha vikwazo vya kiuchumi dhidi ya Iran. Hatua yoyote ya mazungumzo ya moja kwa moja kati ya Viongozi wa juu inaweza kuwa hatua muhimu katika kupunguza mvutano uliodumu kwa muda mrefu. Kwa sasa, dunia inasubiri kuona iwapo utayari huo wa kukutana utageuka kuwa mkutano rasmi na kama makubaliano mapya yanaweza kufikiwa kati ya mataifa hayo mawili yenye ushawishi mkubwa katika siasa za kimataifa. Toa maoni yako #Habari

Trump: “Mabadiliko ya utawala Iran yangekuwa jambo bora zaidi”. Donald Trump, Rais wa Marekani, amesema kuwa mabadiliko ya utawala nchini Iran yanaweza kuwa suluhisho bora kufuatia kile alichokitaja kuwa ni miongo kadhaa ya mazungumzo yasiyozaa matunda kati ya pande hizo mbili. Kauli hiyo inakuja wakati mvutano wa kidiplomasia kati ya Marekani na Iran ukiendelea kuongezeka, hasa kuhusu suala la makubaliano ya nyuklia na usalama wa kikanda. Akizungumza na Waandishi wa habari, Trump alisema: “Mabadiliko ya utawala nchini Iran yangekuwa jambo bora zaidi ambalo lingeweza kutokea. Kwa miaka 47, wamekuwa wakizungumza na kuzungumza. Wakati huo huo, tumepoteza maisha mengi huku wakizungumza. Miguu imepasuka, mikono imepasuka, nyuso zimepasuka. Tumekuwa tukiendelea kwa muda mrefu kwa hivyo hebu tuone kitakachotokea.” Kauli hiyo inaashiria msimamo mkali wa Washington kuhusu mwenendo wa mazungumzo na Tehran, huku Trump akionyesha kutoridhishwa na kile alichokiita historia ya ahadi zisizotekelezwa. Aliendelea kusisitiza kuwa Marekani iko tayari kwa suluhisho la kidiplomasia, lakini kwa masharti maalum: “Kama wakitupa makubaliano sahihi, hatutafanya hivyo lakini, unajua, kihistoria, hawajafanya hivyo. Nitasema wanataka kuzungumza lakini hadi sasa, wanazungumza sana na hakuna hatua.” Trump aliongeza kuwa suluhu ya kudumu ingekuwa mafanikio makubwa kwa pande zote: “Kama tungeweza kusuluhisha mambo mara moja na kwa wote, hilo lingekuwa jambo zuri.” Alipoulizwa ni nani angependa aongoze Iran iwapo mabadiliko ya utawala yangetokea, Trump alijibu kwa tahadhari: “Sitaki kuzungumzia hilo, kuna watu.” Kauli hizi zimezua mjadala mpana kimataifa, huku Wachambuzi wakitathmini iwapo msimamo huo utaongeza shinikizo la kisiasa dhidi ya Iran au kufungua mlango mpya wa mazungumzo ya moja kwa moja. Kwa sasa, macho ya dunia yanaelekezwa katika hatua zitakazochukuliwa na pande zote mbili, huku mustakabali wa uhusiano wa Marekani na Iran ukiwa katika mizani nyeti ya kidiplomasia. Toa maoni yako #Habari

AFC/M23 yasisitiza utekelezaji wa makubaliano ya Doha, yaituhumu Kinshasa kwa “Mbinu za mawasiliano”. Muungano wa Waasi wa AFC/M23 nchini Jamhuri ya Kidemokrasia ya Congo (DRC) umetangaza upya msimamo wake kuhusu wito wa kusitisha mapigano, ukisema uko tayari kutekeleza makubaliano yaliyofikiwa kupitia mchakato wa Doha, huku ukitupia lawama Serikali ya Kinshasa kwa kile ilichokiita “mbinu za mawasiliano” zenye lengo la kupotosha (kutangaza uongo) umma. Kupitia taarifa iliyotolewa na Kiongozi wa AFC/M23, Corneille Naanga, Muungano huo ulieleza kuwa uko tayari kuchukua hatua mara moja katika kutekeleza utaratibu wa usitishaji mapigano uliokubaliwa. Naanga alisema: "Kufuatia wito unaoendelea wa kusitisha mapigano, AFC/M23 inathibitisha tena dhamira yake ya kutekeleza, bila kuchelewa na kwa nia njema, utaratibu uliokubaliwa katika mfumo wa mchakato wa Doha. Hatua hii inaendana na mantiki ya uwajibikaji wa kisiasa na nia ya dhati ya kufikia suluhu ya mazungumzo, ya kudumu na shirikishi ya mzozo huu.” Kauli hiyo inaashiria msimamo wa AFC/M23 wa kuonyesha utayari wa kushiriki katika juhudi za kidiplomasia zinazolenga kumaliza mzozo wa muda mrefu mashariki mwa DRC. Hata hivyo, Muungano huo uliikosoa vikali Serikali ya DRC yenye makao yake Kinshasa, ukidai kuwa tangazo la kukubali kusitisha mapigano si la dhati. Naanga aliongeza: “Kwa AFC, kile kinachodaiwa kuwa kukubali kwa Kinshasa kanuni ya kusitisha mapigano ni mbinu tu ya mawasiliano na jaribio la upotoshaji linalolenga kudanganya maoni ya kitaifa na kimataifa, kujiepusha na wajibu wake na kuficha mwendelezo wa mkakati wa kijeshi usiobadilika.” Kauli hiyo inaibua mvutano mpya wa kisiasa wakati juhudi za kimataifa zikiongezeka kuhimiza pande husika kurejea katika meza ya mazungumzo kupitia mchakato wa Doha. Mzozo kati ya serikali ya DRC na AFC/M23 umeendelea kuathiri hali ya usalama na kibinadamu mashariki mwa nchi hiyo, huku jumuiya ya kimataifa ikiendelea kusisitiza umuhimu wa suluhu ya mazungumzo badala ya mapambano ya kijeshi. Toa maoni yako #Habari

🇫🇷 Macron: “Ufaransa bila Wayahudi ni kama mti usio na shina”. Rais wa Ufaransa Emmanuel Macron amesema kuwa Ufaransa haiwezi kujitambulisha kikamilifu bila uwepo wa Wayahudi, akisisitiza mchango wao wa kihistoria, kiutamaduni na kijamii katika taifa hilo la Ulaya. Akizungumza katika hafla maalum ya kumbukumbu na mshikamano wa kijamii, Macron alitoa kauli iliyogusa hisia za wengi akisema: “Ufaransa bila Wayahudi ni kama mti usio na shina.” Kauli hiyo imefasiriwa kama ujumbe wa wazi wa kupinga chuki dhidi ya Wayahudi (antisemitism) na kuimarisha misingi ya umoja wa kitaifa katika jamii yenye tamaduni na dini tofauti. Kwa miaka ya hivi karibuni, Ufaransa imekumbwa na matukio kadhaa ya chuki dhidi ya Wayahudi, hali ambayo imezua wasiwasi mkubwa ndani na nje ya nchi. Serikali ya Macron imekuwa ikisisitiza mara kwa mara umuhimu wa kulinda uhuru wa kuabudu, usawa na heshima kwa makundi yote ya kidini. Kwa kutumia taswira ya “mti na shina,” Rais huyo alilenga kuonyesha kuwa Wayahudi ni sehemu ya mizizi ya historia ya Ufaransa, si kundi la pembeni bali ni sehemu ya msingi wa taifa hilo. Ufaransa ina moja ya jamii kubwa zaidi za Wayahudi barani Ulaya. Kwa karne nyingi, Wayahudi wamechangia katika sekta mbalimbali zikiwemo elimu, biashara, sayansi, sanaa na siasa. Hata hivyo, historia hiyo pia imegubikwa na vipindi vya mateso, hususan wakati wa Vita Kuu ya Pili ya Dunia. Kauli ya Macron inaonekana kuendeleza msimamo wa viongozi waliotangulia katika kulinda kumbukumbu za kihistoria na kuhakikisha kuwa matukio ya ubaguzi hayajirudii. Kwa ujumla, kauli hiyo imechukuliwa kama wito wa kuimarisha mshikamano wa kitaifa na kulinda misingi ya kidemokrasia. Kwa kusema kuwa “Ufaransa bila Wayahudi ni kama mti usio na shina,” Macron amesisitiza kwamba utofauti wa kidini na kitamaduni si udhaifu bali ni nguzo muhimu ya taifa la Ufaransa. Toa maoni yako #Habari

Trump aendeleza mazungumzo na Iran, Netanyahu akosa ahadi ya msimamo mkali zaidi. Rais wa Marekani, Donald Trump, amesisitiza kuwa Washington itaendelea na mazungumzo ya kidiplomasia na Iran, huku akiepuka kutoa msimamo wa wazi kuhusu iwapo mazungumzo hayo yatapanuliwa zaidi ya suala la mpango wa nyuklia wa Tehran. Akizungumza baada ya mkutano wake na Waziri Mkuu wa Israel, Benjamin Netanyahu, Trump alionyesha nia ya kuendeleza njia ya mazungumzo kama mkakati wa kutafuta suluhu ya kudumu kati ya Marekani na Iran. Alisisitiza kuwa mawasiliano na Tehran yataendelea, akiacha wazi uwezekano wa kufikiwa kwa makubaliano mapya ya kidiplomasia katika siku zijazo. Msimamo huo wa Trump unaonekana kutokidhi matarajio ya Netanyahu, ambaye kwa muda mrefu amekuwa akiitaka Marekani kuchukua msimamo mkali zaidi dhidi ya Iran. Katika mkutano wao wa saba tangu Trump aliporejea madarakani mwaka jana, Netanyahu aliingia katika mazungumzo hayo akiwa na lengo la kushawishi Washington kupanua wigo wa majadiliano. Ziara ya Netanyahu wakati huu ilikuwa ya kimya kimya kuliko kawaida, tofauti na mikutano iliyopita ambayo mara nyingi ilihusisha matamko ya hadharani yenye msisitizo mkali dhidi ya Tehran. Licha ya jitihada zake, hakukuwa na dalili za wazi kuwa Trump alitoa ahadi ya kupanua mazungumzo hayo ili yajumuishe masuala mengine yanayoibua wasiwasi kwa Israel. Netanyahu amekuwa akisisitiza kuwa mazungumzo kati ya Washington na Tehran hayapaswi kujikita tu katika mpango wa nyuklia wa Iran, bali pia yazingatie mpango wake wa makombora ya masafa marefu pamoja na madai ya uungaji mkono wa Tehran kwa makundi ya wanamgambo kama Hamas na Hezbollah. Hata hivyo, hadi sasa, Ikulu ya White House haijaweka bayana iwapo masuala hayo yataingizwa rasmi katika ajenda ya mazungumzo. Kauli ya Trump inaashiria kuwa Marekani bado inaona diplomasia kama njia kuu ya kushughulikia mzozo huo, licha ya shinikizo kutoka kwa mshirika wake mkuu katika Mashariki ya Kati. Hatua ya kuendeleza mazungumzo inaweza kuashiria mwelekeo mpya wa uhusiano wa Marekani na Iran, huku Israel ikiendelea kufuatilia kwa karibu iwapo maslahi yake ya kiusalama yatazingatiwa katika mazungumzo hayo yanayoendelea. Toa maoni yako #Habari

Trump aonya kuhusu makubaliano ya biashara kati ya China na Canada. Rais wa Marekani, Donald Trump, ametoa kauli kali akizungumzia uwezekano wa makubaliano ya kibiashara kati ya China na Canada, akionya kuwa hatua hiyo inaweza kuiweka Canada katika hatari kubwa ya kiuchumi. Akizungumza katika muktadha wa mijadala ya biashara za kimataifa, Trump alidai kuwa China ina uwezo mkubwa wa kiuchumi na kimkakati ambao unaweza kuathiri vibaya mataifa yanayoingia nayo mikataba bila tahadhari ya kutosha. Kwa mujibu wa Trump, Canada inaweza kujikuta ikidhoofishwa endapo itafanya makubaliano ya karibu na taifa hilo la Asia. “Ninasema wazi kabisa, China itaimeza Canada ikiwa watafanya makubaliano kati yao,” alisema Trump. Kauli hiyo imeibua mjadala mpana kuhusu uhusiano wa kibiashara kati ya mataifa makubwa na yale ya kati, hasa ikizingatiwa nafasi ya China kama moja ya nguvu kubwa za uchumi duniani. Wachambuzi wa siasa na uchumi wanasema matamshi ya Trump yanaakisi msimamo wake wa muda mrefu wa tahadhari na hata upinzani dhidi ya ushawishi wa China katika biashara za kimataifa. Hadi sasa, serikali ya Canada haijatoa tamko rasmi kujibu kauli hiyo, huku China pia ikikaa kimya kuhusu madai hayo. Hata hivyo, mjadala unaendelea kuonyesha jinsi masuala ya biashara na diplomasia yanavyoendelea kuwa nyeti katika uhusiano wa kimataifa, hasa yanapohusisha mataifa yenye maslahi makubwa ya kiuchumi. Toa maoni yako #Habari #Trump #China #Canada #Biashara #UhusianoYaKimataifa

WAKAZI WA PAKADJUMA WAKATAA KUONDOKA ENEO LILILOBOMOLEWA, WAKABILIA POLISI LIMETE. Hali ya wasiwasi na taharuki imetanda katika eneo la Pakadjuma, Wilaya ya Limete, Jijini Kinshasa, DR Congo, baada ya Wakazi wa eneo hilo kukataa kuondoka katika sehemu iliyobomolewa na mamlaka za Jiji. Hatua hiyo imesababisha makabiliano kati ya Wakazi na vikosi vya polisi vilivyotumwa kutekeleza agizo la kusafisha eneo hilo. Kwa mujibu wa mamlaka za Jiji la Kinshasa, Wakazi wa Pakadjuma waliondolewa katika eneo hilo kwa sababu kadhaa, ikiwemo madai kuwa makazi hayo yalijengwa bila kufuata mipango rasmi ya Mji, hali inayoyafanya kutambuliwa kama makazi yasiyo halali. Vilevile, eneo hilo limekuwa likitajwa kuwa hatarishi kiafya kutokana na uchafuzi wa mazingira, taka na mafuriko ya mara kwa mara, hali inayodaiwa kuhatarisha maisha ya Wakazi. Hatua ya ubomoaji pia inaelezwa kuwa ni sehemu ya mpango wa upangaji na usafi wa Jiji la Kinshasa, unaolenga kuondoa makazi yaliyojengwa kinyume cha sheria, kurejesha maeneo ya hifadhi na kuboresha miundombinu ya jiji pamoja na usalama wa Wakazi. Hata hivyo, Wakazi wa Pakadjuma wamepinga vikali uamuzi huo, wakisema hawajapewa makazi mbadala wala fidia ya kuridhisha. Wengi wao wameendelea kubaki katika eneo hilo licha ya ubomoaji, wakidai hawana sehemu nyingine ya kwenda. Mmoja wa wakazi hao amenukuliwa akisema, “Hatuwezi kuondoka hapa bila kupata uhakika wa mahali pa kuishi. Nyumba zetu zimebomolewa na hatujapewa suluhisho lolote.” Mvutano uliongezeka pale Polisi walipojaribu kuwasukuma Wakazi kuondoka katika eneo hilo, hali iliyopelekea makabiliano ya moja kwa moja kati ya pande hizo mbili. Mashuhuda wanasema hali ilikuwa ya vurugu kwa nyakati tofauti huku Wakazi wakionyesha hasira zao dhidi ya hatua za mamlaka. Kwa upande wake, Afisa mmoja wa usalama aliyekuwepo eneo la tukio amesema, “Tupo hapa kutekeleza maagizo ya kisheria na kuhakikisha usalama wa Raia wote. Tunawahimiza Wakazi kushirikiana na mamlaka ili kuepuka madhara.” Hadi sasa, hali bado ni tete katika eneo la Pakadjuma, huku Wakazi wakiendelea kushikilia msimamo wao na mamlaka za Jiji la Kinshasa zikiwa bado hazijatoa tamko rasmi kuhusu mpango wa makazi mbadala au fidia kwa Waathirika wa zoezi hilo. Toa maoni yako #Habari

Sumary ya kile tulicho jifunza . Somo jinsi ya kusikia sauti ya MUNGU 2026. ⏩Lengo la MUNGU kumuumba mwanadamu ni mwanadamu asikie fresh kutoka kwa MUNGU. ⏩Mwanadamu akuandaliwa ili kuteseka au kuangaika aishi vipi ila kwa makosa ya Adamu wa kwanza ndiyo mwanadamu akajitenga na wanadamu. ⏩Kumbe sasa sauti ya MUNGU imeandaliwa moja kwa moja kwa ajiri ya wanadamu. #Mithali 8:4 ⏩Ukikosea kusikia umekosea kuamua hatma yako ⏩Mwanadamu aliye fanikiwa kumsikia Mungu ndo mwanadamu aliye fanikiwa katika maisha. ⏩Sauti ya Mungu inabeba maonyo ,maelekezo,inafundisha . ⏩Kila ambaye mekuwa domant kwenye maisha ni mtu ambaye bado ajamsikia Mungu ⏩Kila unacho kiomba kimebebwa katika sauti ya Mungu,kushindwa kumsikia Mungu maombi yanapoteza maana. ⏩Akuna aliye wahi msikia Mungu na akabaki kuwa wakawaida. Wanaofundishwa na Bwana peke yake ndio wanapiga hatua. #Torati 4:35-36 Kila anaye ishi kwa mafanikio duniani ananguvu inayo msimamosha either kutoka kwa Mungu au shetani. https://chat.whatsapp.com/LAB9tcfvKq887DB9IDHvzf #2026_sisi_ndio_wale _tunapiganiwa_na_Bwana.